நண்பன் கார் தராததால் ஆத்திரம்! சினிமா பாணியில் கட்டையால் கார் கண்ணாடிகளை உடைத்தவர் கைது.

கிருஷ்ணகிரி மாவட்டம், போச்சம்பள்ளி அருகே நண்பரின் காரை முயல் வேட்டைக்கு தர மறுத்ததால் ஆத்திரமடைந்த நபர், சினிமா பாணியில் கட்டையால் காரின் கண்ணாடிகளை அடித்து நொறுக்கிய சம்பவம் பரபரப்பை ஏற்படுத்தியுள்ளது.

எதார்லப்பட்டி கிராமத்தைச் சேர்ந்த சென்னகிருஷ்ணன் மற்றும் தங்கவேல் ஆகியோர் நெருங்கிய நண்பர்கள். கடந்த 15ம் தேதி இருவரும் மது அருந்திய போது, தங்கவேல் முயல் வேட்டைக்கு செல்ல தனது காரை கேட்டுள்ளார். ஆனால், சென்னகிருஷ்ணன் காரை தர மறுத்துவிட்டார்.

இதனால் ஆத்திரமடைந்த தங்கவேல், அங்கிருந்த கட்டையை எடுத்து சினிமா பாணியில் காரின் அனைத்து கண்ணாடிகளையும் சரமாரியாக தாக்கி உடைத்துள்ளார். "காரை தராததற்கு ஒரு போரா?" என வடிவேலு பாணியில் அங்கிருந்தவர்கள் ஆச்சரியப்பட்டனர்.

இதுகுறித்து சென்னகிருஷ்ணன் அளித்த புகாரின் பேரில் தலைமறைவாக இருந்த தங்கவேலை இன்று போச்சம்பள்ளி போலீசார் கைது செய்தனர். அவர் தருமபுரி சிறையில் அடைக்கப்பட்டார்.