தூத்துக்குடி மாநகராட்சி பகுதியில் அமைச்சர் கீதாஜீவன் ஆய்வு மேற்கொண்டார்.

தமிழ்நாடு முதலமைச்சர் மு.க.ஸ்டாலின் உத்தரவிற்கிணங்க தூத்துக்குடி சட்டமன்ற தொகுதிக்குட்பட்ட பகுதி முழுவதும் பல்வேறு வளர்ச்சி பணிகள் நடைபெற்று வருகிறது. குறிப்பாக வடகிழக்கு பருவமழைகாலம் நெருங்கி வருவதால் அதற்கான முன்னெச்சரிக்கை நடவடிக்கை மேற்கொள்ளும் வகையில் மழைநீர் வடிகால், கழிவுநீர் கால்வாய் போன்றவை தூர் வாரப்பட்டு சீரமைக்கப்பட்டு வருகின்றன. இந்த பணிகளை வடக்கு மாவட்ட திமுக செயலாளரும், சமூகநலன் மற்றும் மகளிர் உரிமைத்துறை அமைச்சருமான கீதாஜீவன் நேரில் பார்வையிட்டு ஆய்வு செய்தார்.

அதேபோல், மாநகரில் சில பகுதிகளில் குடிநீர் வால்வு மற்றும் கழிவுநீர் மூடி ஆகியவை சாலை மட்டத்தை விட உயரமாக உள்ளதால் போக்குவரத்துக்கு இடையூறாகவும், இதனால் சாலை விபத்துகள் ஏற்படுவதாகவும் பொதுமக்கள் புகார் தெரிவித்து வந்தனர். அதனைத்தொடர்ந்து அந்தோணியார் ஆலயம், தந்தி ஆபிஸ் சாலை பகுதியில் அமைச்சர் கீதாஜீவன் ஆய்வு மேற்கொண்டு உடனடியாக சீரமைப்பு பணிகளை மேற்கொள்ள மாநகராட்சி அதிகாரிகளுக்கு உத்தரவிட்டார்.

மாநகராட்சி 12வது வார்டுக்குட்பட்ட ஸ்டேட் பேங்க் காலனி, கோமதி பாய் காலனி ஆகிய பகுதிகளில் உள்ள கழிவு நீர் கால்வாய்களை வடகிழக்கு பருவமழைக்காலத்திற்குள் செய்ய வேண்டிய முன்னேற்பாடு பணிகள் குறித்தும் அமைச்சர் கீதாஜீவன் ஆய்வு மேற்கொண்டார். 

இந்நிகழ்ச்சிகளில் மாநகராட்சி ஆணையர் மதுபாலன், மாநகர திமுக செயலாளர் ஆனந்தசேகரன், போல் பேட்டை பகுதி செயலாளர் ஜெயக்குமார், சுரேஷ்குமார், கவுன்சிலர்கள் தெய்வேந்திரன், பொன்னப்பன் பேபி ஏஞ்சலின், வட்டச் செயலாளர்கள் சந்தனமாரிமுத்து, பொன்ராஜ், கங்காராஜேஷ், வட்ட பிரதிநிதிகள் திலகர், பாஸ்கர் உள்பட பலர் கலந்து கொண்டனர்.