புதுச்சேரியில் பல்வேறு இடங்களில் இருசக்கர வாகன திருட்டில் ஈடுபட்ட தமிழக திருடனை கைது செய்த போலிசார், அவரிடமிருந்து ரூ.6 லட்சம் மதிப்பிலான இருசக்கர வாகனங்களை பறிமுதல் செய்தனர்.

புதுச்சேரி நகரப்பகுதியில் இருசக்கர வாகனங்கள் திருடு போகும் சம்பவங்கள் நாளுக்கு நாள் அதிகரித்து வருகிறது. இதனால் இரவு நேரங்களில் போலிசார் தீவிர ரோந்து பணியில் ஈடுபட்டு வருகின்றனர்.

இந்த நிலையில், ரெயின்போ நகர் - 45 அடி சாலையில் பெரியக்கடை போலிசார் நேற்றிரவு ரோந்து பணியில் ஈடுபட்டிருந்தனர். அப்போது சந்தேகப்படும்படி பைக்கில் வந்த நபரை மடக்கி பிடித்து விசாரணை செய்த போது அவர் முன்னுக்கு பிண் முரணாக பதிலளித்தார். இதனால் சந்தேகம் அடைந்த போலீசார் அவரை காவல் நிலையம் அழைத்து சென்று விசாரணை மேற்கொண்டதில், சிதம்பரத்தை சேர்ந்த பிரபல திருடன் என்பதும் அவர் ஓட்டி வந்தது திருட்டு பைக் என்பதும் தெரியவந்தது.

மேலும் விசாரணையில், புதுச்சேரியில் பல்வேறு இடங்களில் இருசக்கர வாகனத்திற்கு ஈடுபட்டது தெரியவந்தது. இதனை அடுத்து அவரை கைது செய்த போலீசார், அவரிடம் இருந்து ரூபாய் 6 லட்சம் மதிப்பிலான பைக்குகளை பறிமுதல் செய்தனர். பின்னர் நீதிமன்றத்தில் ஆஜர் படுத்தி காலாப்பட்டு மத்திய சிறையில் அடைத்தனர்.

- இரா.சரவணன் செய்தியாளர் புதுச்சேரி