ஊருக்குள் உலா வரும் ஒற்றை காட்டு யானையால் அச்சத்தில் கிராம மக்கள் -முன்னெச்சரிக்கை நடவடிக்கையாக கரிசல் குடியிருப்பு கிராமத்தில் மின்சாரம் துண்டிப்பு.

தென்காசி மாவட்டம், பண்பொழி அருகே உள்ள கரிசல் குடியிருப்பு கிராமத்தில் உள்ள கரிசல்குளம் பகுதியில் உலா வரும் ஒற்றை யானையால் பெரும் பரபரப்பு ஏற்பட்டுள்ளது.

குறிப்பாக, விவசாய நிலங்கள் அதிகம் உள்ள இந்த பகுதியில் நேற்று நள்ளிரவு வந்த ஒற்றை காட்டு யானையானது திரும்ப செல்லாமல் தற்போது அதே பகுதியில் சுற்றி வரும் நிலையில், அந்த பகுதியில் உள்ள பொதுமக்கள் மிகுந்த அச்சத்திற்கு உள்ளாகி உள்ளனர்.

மேலும், சம்பவம் குறித்து தகவல் அறிந்து விரைந்து சென்ற வனத்துறையினர் யானையை விரட்டும் முயற்சியில் ஈடுபட்டும் அந்த முயற்சி பலன் அளிக்காமல் யானையானது அந்த குளத்தை சுற்றியுள்ள பகுதியில் உலா வரும் நிலையில், விவசாயிகள் தங்களது விவசாய நிலங்களுக்குள் செல்ல முடியாமல் மிகுந்த சிரமத்திற்கும் அச்சத்திற்கும் உள்ளாகியுள்ளனர்.

அதேபோல், யானை மிதித்து ஆறுமுகச்சாமி (53) என்ற நபர் படுகாயம் அடைந்துள்ளதாக கூறப்படும் நிலையில், அது தொடர்பாக தற்போது போலீசார் தீவிர விசாரணை நடத்தி வரும் நிலையில், அந்த பகுதியில் வனத்துறையினர் முகாமிட்டு யானையை விரட்டும் முயற்சியில் தீவிரமாக ஈடுபட்டு வரும் நிலையில், தற்போது கரிசல் குடியிருப்பு கிராம் முழுவதும் பாதுகாப்பு முன்னெச்சரிக்கை நடவடிக்கையாக மின்தடை ஏற்படுத்தப்பட்டுள்ளது.

மேலும், தற்போது தென்காசி வருவாய் கோட்டாட்சியர் லாவண்யா சம்பவ இடத்தில் ஆய்வு மேற்கொண்டு வரும் நிலையில், யானையை விரட்டுவதற்காக வனத்துறையினர் மேற்கொண்டு வரும் முயற்சிகள் குறித்து ஆலோசனையில் ஈடுபட்டு வருவது குறிப்பிடத்தக்கது.